Maurice Chevalier

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo ye sobre un actor y cantaire francés; ta atros usos, se veiga Maurice Chevalier (desambigación).

Maurice Chevalier
Maurice Chevalier arredol de 1920.
Información personal
Calendata naiximiento:	12 de setiembre de 1888
Puesto naiximiento:	París
Calendata muerte:	1 de chinero de 1972
Puesto muerte:	París
Conchuche:	Yvonne Vallée (1928-1934)
Premios Oscar
Nominau a l'Oscar a o Millor Actor: -1930: por The Love Parade y The Big Pond.

Maurice Auguste Chevalier (d'o suyo nombre artistico Maurice Chevalier), naixito de París (Isla de Francia) o 12 de setiembre de 1888 y muerto tamién en París l'1 de chinero de 1972, estió un destacau actor y cantaire francés, activo en o mundo d'a musica francesa dende zaguerías d'o sieglo XIX encara nino en bellos café-concierto, prencipió a suya carrera cinematografica como continación da suya carrera musical en o mundo d'o cine francés dende primerías d'o sieglo XX, treballando en arredol de 50 cintas, cuasi todas de chenero musical. Dende os anyos 1930 treballó tamién en o cine estausunidense (y muitas d'as suyas cintas, como yera costumbre en ixas envueltas, teneban una doble versión en anglés y en francés, ta profeitar a suya popularidat en o suyo país natal).

Dimpués d'as suyas primeras cintas, en esclatar a Primera Guerra Mundial, cridoron a Maurice como soldau en l'Exercito francés. Bien luego recibió feridas de guerra y se convertió en presonero de guerra en l'Imperio Alemán mientres do anyadas, dica la suya liberación en 1916 (por intervención d'o rey Alifonso XIII d'Espanya).

En rematar la guerra, tornó en o mundo d'o cine, y l'actriz Mistinguett lo descubrió y lo convirtió en companyero en bellas d'as suyas cintas, iniciando asinas a suya carrera enta la fama. Dende zaguerías d'os anyos 1920 prencipioron as interpretacions en Estaus Unius y se convertió en un actor bien conoixiu. Tanimientres, mientras a Segunda Guerra Mundial a suya actuación estió prou controvertida en o suyo país, en considerar-se en rematar la guerra que no heba amostrau denguna simpatía enta los Aliaus y de Gaulle y sí bellas simpatías por o rechimen colaboracionista d'a Francia de Vichèi dirichida por o mariscal Philippe Pétain; de resultas de tot ixo, a suya carrera s'en resintió en o suyo país natal, a lo menos en as primeras anyadas d'a posguerra.